Debat uiversitar: Integrimi i Maqedonisë në NATO dhe BE

Tetovë, 13 mars - Integrimi i Maqedonisë në NATO dhe Bashkimin Evropian, ka qenë tema e radhës në Debatin universitar. Të enjten në mbrëmje para auditorit të Universitetit Shtetëror të Tetovës dhe TVM-së, ambasadori i Republikës së Francës në Maqedoni, ekselenca e tij, Bernard Valero është përballur me studentët, duke u përgjigjur në njërën ndër çështjet më aktuale, respektivisht,proceset integruese të Maqedonisë.

“Franca është ajo që hapi shtegun për integrimin e Ballkanit dhe kjo ndodhi në Samitin e Zagrebit. Franca bëri që ëndrra e Ballkanit të ekzistoj”, është përgjigjur ambasadori Valero në pyetjen se cili është rroli i Francës për integrimin e Ballkanit në Bashkimin Evropian. Ai ka bërë të ditur se Franca përkrah Maqedoninë në rrugën e saj integruese drejt NATO-s dhe BE-së. Valero në këtë drejtim ka potencuar se Parizi zyrtar nëpërmjet financimit të projekteve të ndryshme nga BE-ja, përkrah Maqedoninë në përgatitjen e standardeve për integrim euro-atlantik.

Ambasadori francez nuk ka dashur të bëj komente për gjendjen aktuale politike në Maqedoni, duke potencuar se ai është në pozicionin e një vëzhguesi i cili vetëm raporton në vendin e tij për atë që ndodh në Maqedoni.
“Jam optimist se drejtimi në të cilin ec procesi është i mirë dhe shpresoj se rezultati do të jetë i suksesshëm. Shpresoj se politikanët në Maqedoni me mençuri do të shmangin aksidentet rrugore” ka thënë Valero. Ai në vazhdim ka folur edhe për bashkëpunimin ndërmjet universiteteve franceze dhe universiteteve në Maqedoni. Ai ka potencuar bashkëpunimin e Universitetit Shtetëror të Tetovës dhe Universitetit të Lomozhit, që sipas tij paraqet një bashkëpunim i suksesshëm.

“Nuk diskutohet për atë se a duhet të realizohet Marrëveshja e Ohrit, një gjë e tillë as nuk duhet të vihet në diskutim. Këtë e thot Franca, këtë e kërkojnë edhe partnerët tane evropjan. Megjithatë për tu realizuar kjo marrëveshje duhet angazhimi i të dyja palëve dhe jo vetëm njëra të jetë ajo që kërkon” ka thënë Valero. Në vazhdim ambasadori Valero ka folur edhe për çështjen e emrit, respektivisht për kontestin me Greqinë. Ai ka thënë se kjo çështje duhet të zgjidhet para Samitit të Bukureshtit.