14 qershor 2008 - Ekspozita vjetore e studentëve të artit figurativ në USHT

 

Studentët e programit studimor Art figurativ pranë Universitetit Shtetëror të Tetovës, në ambientet e Fakultetit të arteve organizuan ekspozitën vjetore. Studentë të drejtimeve pikturë, grafikë, skulpturë dhe dizajn grafikë kishin përgatitur qindra punime arti të cilat i ekspozuan para artdashësve.
Me rastin e hapjes solemne, të pranishmëve iu drejtua dekani i Fakultetit të arteve, Doc. mr. Safet Spahiu. Ai u shpreh shumë i kënaqur me punimet e studentëve. “Punimet e studentëve dëshmojnë njëkohësisht aftësitë e tyre dhe punën e profesorëve në Universitetin Shtetëror të Tetovës. Unë si dekan dhe profesorët tjerë mburremi me këta studentë dhe punimet e tyre. Kjo ekspozitë është rrumbullakimi i sukseseve njëvjeçare dhe pune të përbashkët me studentë. Për këto tregojnë veprat e realizuara të studentëve, sepse artistët më mirë shprehen me punime artistike se sa me fjalë” tha ndër të tjera, dekani i Fakultetit të arteve.

Në emër të Rektorit të USHT-së, të pranishmëve iu drejtua edhe Sekretari i gjeneral, Ali Salihi i cili përgëzoi studentët për punimet e realizuara.

Me këtë rast Fakulteti i arteve ndau edhe çmime për studentë më të dalluar edhe atë: Bademe Spahiu si studente më e mirë në pikturë, Hilmi Mehmeti në skulpturë, Nagip Ismaili në grafikë dhe Enesa Islami si studente më e dalluar e vitit.
Të pranishëm në hapjen solemne të ekspozitës ishin profesorë, studentë, përfaqësues të ambasadave të ndryshme në Maqedoni,  dhe shumë artdashës. Në fund u organizua edhe një koktej i rastit.