USHT dhe Oda Ekonomike e Maqedonisë nënshkruajnë marrëveshje bashkëpunimi

Në praninë e udhëheqësish më të lartë të të dy institucioneve, Universiteti Shtetëror i Tetovës dhe Oda Ekonomike e Maqedonisë nënshkruan memorandum bashkëpunimi. Memorandumi u nënshkrua nga Rektori i USHT-së. Prof. dr. Sadi Bexheti dhe kryetari i Odës Ekonomike të Maqedonisë, zt. Branko Azeski. Marrëveshja e bashkëpunimit ka për qëllim bashkëpunimin e ndërsjellë për nevojat e arsimit dhe ekonomisë, përmes mundësimit të punës praktike për studentët e USHT-së, në zyrat qendrore dhe regjionale si dhe kompanitë anëtare të Odës Ekonomike, organizimin e takimeve të përbashkëta me kompanitë anëtare të Odës dhe studentëve të USHT-së, organizimin e përbashkët të seminareve dhe trajnimeve, edukimin dhe trajnimin e ndërmarrësve, përgatitjen e projekteve të përbashkëta shkencore etj.

Me këtë rast, Rektori i USHT-së, prof. dr. Sadi Bexheti u shpreh: “Marrëveshja mes USHT-së dhe Odës Ekonomike të Maqedonisë është një ndër më të rëndësishmet.

Bashkëpunimi mes dy institucioneve tona do jetë në funksion të studentëve dhe biznesit. Përmes Qendrës Studentore dhe të Karrierës së USHT-së dhe shërbimeve të Odës Ekonomike, do të vëmë në kontakt studentët me botën e ndërmarrësish, me bizneset, për punë praktike por edhe për punësime”. Nga ana tjetër, kryetari i Odës Ekonomike të Maqedonisë, zt. Branko Azeski theksoi: “Kjo marrëveshje bashkëpunimi vjen si nevojë e kohës, pas ndryshimeve në ligjin e lartë për arsim që parasheh edhe punën praktike si pjesë e studimeve.

Pikërisht këtu ndërhyjmë që të dy institucionet duke mundësuar një lidhje mes studentëve dhe komunitetit të biznesit në Maqedoni, qoftë për punësime, qoftë për punë praktike”.  Marrëveshja e bashkëpunimit nga ana e USHT-së do të implementohet nga Qendra studentore dhe e Karrierës pranë Universitetit Shtetëror të Tetovës.