Kundërpërgjigje ndaj enciklopedisë maqedone të botuar

21 maj 2008 -Katedra e historisë pranë Universitetit Shtetëror të Tetovës, për shkak të mos marrjes së përgjigjes ndaj memorandumit dërguar të gjitha institucioneve relevante lidhur me tërheqjen e enciklopedisë maqedone të botuar nga shoqata e shkrimtarëve të Maqedonisë, ka vendosur të botoj një Enciklopedi të veçantë për shqiptarët e Maqedonisë.

Këtë e konfirmoi prof. Vebi Xhemaili i cili në press-konferencën e organizuar enkas për këtë shkas. Ai numëroi edhe arsyet e një iniciative të tillë: “Në këto vëllime enciklopedish maqedonase bëhen malverzime të ndryshme mbi historinë e shqiptarëve të Maqedonisë, bile edhe të shqiptarëve në përgjithësi si komb. Një pjesë e konsiderueshme e tekstit është trillim dhe i pabazuar në fakte historike”- shpreh Xhemaili. Ai ndërkohë edhe numëroi “gabimet” në enciklopedi që sipas tij, autorët maqedonas i kanë bërë qëllimisht, por që ndërkohë kanë devijuar jo vetëm historinë e shqiptarëve, por edhe të maqedonasve.

Enciklopedia e shqiptarëve të Maqedonisë do të përpilohet dhe botohet nga Programi studimor i historisë pranë USHT-së, në bashkëpunim të ngushtë me Institutin e historisë në Tiranë dhe atë të Prishtinës si dhe me ndihmën e historianëve të tjerë.

Paraprakisht, në amfiteatrin e rektoratit të USHT-së, u mbajt një konferencë kushtuar kryengritjes së Dervish Carës me çrast u lexua edhe një referat përgatitur nga Mr. Zeqirja Rexhepi, nga programi studimor i Historisë. Referati në fjalë është përgatitur pikërisht për të ndriçuar një pikë të historisë së shqiptarëve në Maqedoni, e kontestuar në enciklopedinë e Maqedonisë e botuar nga shoqata e shkrimtarëve të Maqedonisë.