Studentët e USHT-së kërkojnë trajtim të barabartë

Më 21 maj 2009, Parlamenti studentor i USHT-së organizoi protestë në mbrojtje të universitetit. Mijëra studentë u bashkuan për të shprehur pakënaqësinë lidhur me trajtimin joadekuat që po i bëhet USHT-së dhe rrjedhimisht studentëve. Protesta u organizua me mbështetjen e qytetarëve, shoqatave të dala nga lufta, organizatave jo qeveritare të vendit dhe të huaja, si dhe disa subjekteve politike shqiptare në vend. Protestës iu bashkëngjitën edhe Rektori i parë i Universitetit të Tetovës, prof. dr. Fadil Sulejmani, ish Rektori i USHT-së, prof. dr. Sadi Bexheti, prorektorët aktual të USHT-së, dekanë e profesorë të USHT-së.

Kryetari i Parlamentit studentor të USHT-së, në fjalimin e tij gjatë protestës u shpreh: “Jemi tubuar sot që në mënyrë të qetë të kërkojmë që të trajtohemi njëjtë si gjithë universitetet tjera shtetërore ne vend. Jemi mjaft të diskriminuar që USHT-së i bëhet presion në të gjitha format duke përgjysmuar buxhetin herë pas here, duke disperzuar universitetin në qytete tjera pa mos u konsultuar dhe pa marrë pëlqim nga ana e senatit të USHT-së, i cili është organ kompetent për vendime të tilla.

Qeveria shkel autonominë e USHT-së, duke vendosur për USHT-në ministria e arsimit dhe shkencës bashkërisht me qeverinë”. Më tej, në emër të gjithë studentëve të USHT-së, duke iu drejtuar Qeverisë së RM-së dhe Ministrisë së arsimit dhe shkencës së RM-së ai shtoi: “Sot kërkojmë që për herë të fundit të rifreskoni qëndrimet tuaja ndaj këtij institucioni dhe të keni qasje më të drejtë ndaj USHT-së, në të kundërtën ne nuk do të pushojmë së organizuari për të mbrojtur këtë tempull të cilin e krijuam me mund dhe mjaft sakrifica. Ne kërkojmë nga Qeveria e RM-së dhe ministritë përkatëse:

- Rishikimin e buxhetit të USHT-së për vitin 2009, duke respektuar kriteret ligjore për ndarje të buxhetit për universitetet shtetërore, si: numri i fakulteteve/programeve studimore/drejtimeve, numri i studentëve, numri i stafit akademik dhe teknik i angazhuar, gjendja aktuale e infrastrukturës dhe nevojat për infrastrukturë, pajisje dhe laboratore;

- Vende të reja pune për profesorë, asistentë dhe staf administrativ-teknik bazuar në kriteret ligjore: numri i fakulteteve, numri i studentëve, numri aktual i profesorëve;

- Ndërprerjen e presionit të vazhdueshëm përmes inspektimeve të ndryshme të jashtëzakonshme, e që cënojnë drejtpërsëdrejti autonominë e universitetit;

- Azhurimin e menjëhershëm të lëndës së Poliklinikës universitare, e që ka ngec në burokracinë e MASH-it dhe Ministrinë e Financave;

- Rregullimin e formës së financimit për Fakultetin e Biznes Administratës në Kumanovë dhe programit studimor të ekologjisë në Strugë.

- Ndërprerjen e marrjes së vendimeve për çështje vitale si psh. disperzime studimesh në qytete të ndryshme të RM-së, nga komisione joprofesionale dhe joadekuate, pa konsultimin me organet e USHT-së, e sidomos pa marrje të mendimit nga Senati i USHT-së, dhe krejt në fund.....

- Trajtim adekuat si gjithë institucionet tjera e larta arsimore në RM, asgjë më shumë.”