Donacione nga Prishtina dhe Vjena për Fakultetin e shkencave të mjekësisë

 

25 qershor 2008 – Një numër i konsiderueshëm literaturë shkencore nga fusha e mjekësisë i është dhuruar Universitetit Shtetëror të Tetovës, Fakultetit të Shkencave të Mjekësisë. Donacioni është realizuar me iniciativë të radiologut dr. Bujar Gjikolli (Kosova Open Medical Club) me ndihmën e Jane Lowers nga revista Diagnostic Imaging dhe me transport të mundësuar nga Global Foundation (SHBA) dhe prof. dr. Barry Goldberg nga Thomas Jefferson University Hospital-Filadelfi dhe KFOR-i amerikan.
Njëkohësisht, përmes dr. Basri Shehut është realizuar edhe donacioni i Fakultetit të mjekësisë në Universitetin e Vjenës për Fakultetin e Shkencave të Mjekësisë në USHT, në shtretër dhe aparaturë mjekësore.

Dr. Nexhbedin Karemani, udhëheqës i Fakultetit të Shkencave të Mjekësisë në USHT falënderoi miqtë nga Kosova për ndihmën në literaturë shkencore si dhe dr. Shehun për realizimin e donacionit prej 15 shtretërve  dhe një pajisje e sofistikuar laserike për operimin e kafshëve eksperimentale, pajisje për fizioterapi.
Dr. Gjikolli shprehu gatishmërinë që edhe në të ardhmen të vazhdoj ky bashkëpunim dhe se do të shfrytëzoj bashkëpunimet me institucionet amerikane për të ndihmuar Universitetin Shtetëror të Tetovës.”Bashkëpunimi i deritanishëm me Rektorin besoj se do të vazhdoj edhe me projekte të ardhshme”- u shpreh dr. Gjikolli.
Rektori i USHT-së, prof. dr. Sadi Bexheti falënderoi donatorët nga Prishtina dhe Vjena për ndihmën që i japin Universitetit në momentin e duhur. “Titujt e dhuruar në gjuhën angleze kanë vlerë të jashtëzakonshme dhe do të na ndihmojnë në avancimin dhe profesionalizimin tonë. Edhe për pjesën praktike të programeve studimore në Fakultetin e Shkencave të mjekësisë, donacioni në shtretër dhe pajisja laserike për fizioterapi janë më se të qëlluara, krahas përgatitjeve tona paraprake dhe me ndihmën e Ministrisë e arsimit dhe shkencës, për mundësimin e kushteve sa më të mira  për realizimin e studimeve dhe ushtrimeve për studentët e mjekësisë në USHT.”- u shpreh Rektori Bexheti.
Vlera e dy donacioneve kap vlerën e qindra mijë eurove.