Delegacion i Universitetit të Vjenës qëndroi në USHT

 

29 maj 2008 - Një delegacion i Fakultetit filozofik dhe shkencave të edukimit pranë Universitetit të Vjenës, i udhëhequr nga përgjegjësja e departamentit të shkencës, prof. dr. Ilse Schrittesser dhe prof. dr. Ednan Aslan qëndruan në Universitetin Shtetëror të Tetovës. Në takim ishin të pranishëm edhe sekretari i përgjithshëm i Bashkësisë islame të Maqedonisë, Afrim Tairi dhe shefi i kabinetit të BIM, Agron Vojnika.

Rektori i USHT-së, prof. dr. Sadi Bexheti dhe përgjegjësi i programit studimor gjuhë dhe letërsi gjermane prof. Izer Maksuti u shprehën mirënjohës për këtë vizitë dhe shprehën falënderim për përkrahjen e ofruar për Universitetin Shtetëror të Tetovës nga një Universitet me famë botërore siç është ai i Vjenës. Rektori informoi delegacionin me zhvillimet e fundit në Universitet si dhe kushtet dhe kapacitetet që ofron Universiteti Shtetëror i Tetovës.
Znj. Schrittesser në emër të Universitetit të Vjenës premtoi një ndihmesë në drejtim të avancimit profesional të kuadrit të USHT-së në Universitetin e Vjenës, në fushat e edukimit për asistentë e profesorë të USHT-së.

Delegacioni i Vjenës më vonë u takua edhe me Ministrin e arsimit dhe shkencës ku u diskutuan mënyrat dhe procedurat e fillimit të bashkëpunimit mes 2 institucioneve të larta arsimore, Universitetit të Vjenës dhe Universitetit Shtetëror të Tetovës.

 

Udhëheqës të Spitalit nga Hamburgu në vizitë pune në USHT

Të mërkurën, 28 maj 2008, në Universitetin Shtetëror të Tetovës qëndruan udhëheqësi i departamentit të urologjisë në Klinikën Segeberger në Hamburg, dr. Aksam A. Zassin dhe dr. Farid Saad, drejtor shkencor i Bayer HealthCare. Njëkohësisht, ata janë edhe profesorë në Gulf Medical College në Emiratet Arabe.
Ata u pritën nga Rektori i USHT-së, prof. dr. Sadi Bexheti, me çrast u diskutuan mënyrat e bashkëpunimit mes fakultetit të shkencave të mjekësisë së USHT-së dhe institucioneve që ata përfaqësojnë, atë të Hamburgut dhe të Ajmanit. Mysafirët shprehën gatishmëri në ofrimin e më shumë shërbimeve për Universitetin Shtetëror të Tetovës duke filluar nga stafi ligjërues në fusha të nevojshme, ofrimin e shërbimeve të konsulencës, rimodelimit të kurrikulave dhe menaxhimit me fakultetin e shkencave të mjekësisë, si dhe inputeve të nevojshme mjekësore për studime mjekësore.