Debat universitar: Thaçi premton realizimin e kërkesave shqiptare

 

 

Tetovë, 27 mars – Situata aktuale politike dhe sfidat që presin Maqedoninë para Samitit të NATO-s, kanë qenë tema e radhës në Debatin universitar. Të enjten në mbrëmje para auditorit të Universitetit Shtetëror të Tetovës dhe TVM-së, kryetari i Partisë Demokratike Shqiptare, Menduh Thaçi është përballur me studentët, duke u përgjigjur në disa tema të cilat tangojnë shqiptarët e Maqedonisë dhe rajonin më gjerë.

Ndër temat që ka trajtuar Thaçi ka qenë edhe marrëveshja me kryeministrin Gruevski, për gjashtë pikat e parashtruara nga partia e tij, si kusht për kthim në Qeveri. I pyetur se cilat janë garancitë se kryeministri do t’i përmbahet kësaj marrëveshje, kreu i PDSH-së ka thënë: “Gjashtë kërkesat e tona do të realizohen meqenëse pas tyre qëndron PDSH-ja dhe pas tyre qëndron faktori ndërkombëtar”. Në vazhdim ai ka elaboruar këtë problematik, duke potencuar se tashmë pas pavarësisë së Kosovës kërkesat e shqiptarëve nuk mundet të mbesin peng i asnjë procesi tjetër.

Ai gjithashtu ka folur edhe për dosjen e tij, të cilën e ka publikuar po të njëjtën ditë në Parlament. Thaçi ka thënë se duke u nisur nga e kaluara njeriut të cilit i hapet dosja, përfundimi i tij duhet të jetë, ose ekzekutim fizik ose 30 vjet burgim.

“Për mua personalisht dosja e radhës nuk përbën as çudi dhe as habi meqë nuk është dosja e parë  nga shërbimi sekret maqedonas. Kjo është dosja e tretë personale, meqë dosjen e parë e kam pasur prej shërbimit sekret Jugosllav që në moshën 19 vjeçare. Pra kjo është dosja më e re, e treta që i përket viteve të pushtetit LSDM-BDI, që do të thotë katër vite shkelje drastike të të drejtave dhe lirive të njeriut, katër vite përndjekje dhe survejime, katër vite nëpërkëmbje të demokracisë” ka thënë kryetari i PDSH-së, Menduh Thaçi.

 

Ai ka paralajmëruar se aktorët e kryesor të kësaj dosje do ti denoncoj, madje dhe do të ngre procedura gjyqësore, dha të jo vetëm në kuadër të institucioneve të sistemit gjyqësor në Maqedoni, por edhe në Gjykatën e Strasburg. Kreu demokrat ka thënë se avokatë me renome ndërkombëtare i kanë garantuar se dëmshpërblimi do të jetë miliona euro, për shkak të shkeljes flagrante që më është bërë mua dhe familjes time, ndërsa ka paralajmëruar se dëmshpërblimin do ta përdor për të demaskuar ata të cilët bëjnë të tilla dosje. Sipas ti kjo do të ndikoj që të parandalohet kjo gjë jo vetëm për politikanët, por edhe për njerëzit e rëndomtë.