Formohet Qendra për Studime Shqiptare

Durrës, 7 mars - Universiteti Shtetëror i Tetovës (USHT), Universiteti për Biznes dhe Teknologji (UBT) nga Prishtina, si dhe Universiteti “Marin Barleti” (UMB) nga Tirana, kanë nënshkruar memorandum për Formimin e Qendrës për Studime Shqiptare. Gjatë Konferencës për Bashkëpunim Ekonomik Shqipëri – Kosovë, që është mbajtur në Durrës, përfaqësues të tre universiteteve në fjalë kanë nënshkruar Memorandum për formimin e Qendrës për Studime Shqiptare, qëllimi i së cilës është frymëzimi dhe organizimi i studimeve ekonomike, politike, sociologjike, me kontekst panshqiptar që favorizojnë integrimin euroatlantik të shqiptarëve.

Në emër të Rektorit të Universitetit Shtetëror të Tetovës, prof. dr. Sadi Bexheti, Konferencën për Bashkëpunim Ekonomik Shqipëri – Kosovë, e ka përshëndetur mr. sc. Qufli Osmani, i cili ndër të tjera ka folur për rëndësinë e bashkëpunimit akademik ndërmjet Shqipërisë, Maqedonisë dhe shtetit të ri të Kosovës.

“Perspektiva e përbashkët, synimet dhe trendët zhvillimore në fushën e arsimit bashkëkohor akademik, vazhdimisht na detyrojnë të jemi në link të ndërsjellë me universitetet si motra. Këtë perspektivë dhe synim e formalizuam edhe me nënshkrimin e Memorandumit për bashkëpunim, mes Universitetit Shtetëror të Tetovës, Universiteti për Biznes dhe Teknologji, si dhe Universiteti “Marin Barleti”. Jemi të vetëdijshëm se na presin shumë sfida në të ardhmen, por ne jemi të gatshëm të ballafaqohemi me to dhe të mbetemi kompatibil me universitetet tjera prestigjioze evropiane”, ka thënë Osmani. Në vazhdim ai ka potencuar se universitetet shqiptare duhet të marrin rolin historik në krijimin e sistemeve të reja të vlerave.
Nga ana e USHT-së, Memorandumin e ka nënshkruar sekretari gjeneral i Universitetit, Ali Salihi.

Kjo qendër gjithashtu do të ofroj bursa për hulumtuesit e huaj, të cilët si qendër studimi kanë faktorin shqiptar në përgjithësi. Me këtë Memorandum parashihet që Qendra të ketë revistën e saj shkencore gjeopolitike. Në të njëjtën kohë tre universitetet bien dakord për bashkëpunim në fushën akademike si shkëmbimin e kutikulave, lektorëve, studentëve, si dhe organizimin e konferencave dhe seminareve me tematika me interes të përbashkët.   
Qendra për Studime Shqiptare do të menaxhohet sipas parimit të rotacionit.