Në Universitetin Shën Kirili dhe Metodi Mr. Zeqir Rexhepi mbrojti temën e doktoraturs   

Më 9 korrik 2009, në Institutin e Historisë Nacionale në Shkup, Mr. Zeqirja Rexhepi mbrojti tezën e doktoraturës, me ç’rast mori titullin DOKTOR I SHKENCAVE HISTORIKE. Teza e doktoraturës, “Ideja e Evropës së Bashkuar – historiku, zhvillimi dhe perspektiva”, u mbrojtë përpara komisionit pesë anëtarësh, në përbërje: .Prof. dr. Lazar Lazarov, Prof. dr. Todor Çepërganov, Prof. dr. Ljubica Jançeva, Prof. dr. Vasil Jotevski dhe Prof. dr. Gjorgji Çakarjanevski.

“Ideja e Evropës së Bashkuar – historiku, zhvillimi dhe perspektiva”, është një hulumtim shkencor, që merret me çështjen e zhvillimit dhe jetësimit të idesë së kahmotshme, të ideologëve dhe mendimtarëve evropian për bashkimin e popujve të kontinentit tonë, filluar nga zanafilla e idesë evropiane e deri në konkretizimin e saj. Është mjaft me interes procesi evolutiv i idesë evropiane nëpër shekuj dhe përpjekjet për bashkim të popujve evropianë, proces që është në zhvillim e sipër.

Zeqirja Rexhepi gjatë punimit të tezës së doktoraturës, në veçanti ka hulumtuar përpjekjet e mendimtarëve për një Evropë të Bashkuar, në shekullin XIX dhe XX, si: Sen Simonit, Viktor Hygosë, Adam Smitit, Lorimerit, Jozef Prudonit, Kalerxhit, Eduard Heriosë dhe Aristid Brajanit...

Pra, Zeqirja Rexhepi në hulumtimin e vet me të drejtë potencon se ideja e Evropës së Bashkuar filloi të konkretizohet vetëm pas tragjedisë së popujve evropianë në Luftën e Dytë Botëror, e cila solli vetëdijësimin e popujve, në veçanti të atyre që gjatë të kaluarës historike ishin përpjekur për supremaci në kontinent, si dhe fillimin e një faze të re historike, atë të bashkëpunimit të popujve, fillimisht në sferën ekonomike e më pas edhe në sferat tjera.

Sot, Evropa e Bashkuar, ose siç emërtohet si Unioni Evropian, është një realitet i gjallë që zhvillohet në kahje të mirëqenies ekonomike dhe politike të popujve evropianë, gjë që dëshmon procesi i zgjerimit të saj me vende të reja.
Por, Zeqirja Rexhepi gjithashtu konstaton se ideja Evropës së Bashkuar, do të mbetet e parealizuar po qe se ky projekt ndërpritet së zgjeruari, përveç vendeve të Ballkanit edhe të vendeve tjera, siç janë: Rusia, Ukraina dhe Bellorusia. Vetëm atëherë do të realizohej në tërësi ideja e filozofëve për një Evropë të Bashkuar.
Duke hulumtuar në temën e doktoraturës “Ideja e Evropës së Bashkuar – historiku, zhvillimi dhe perspektiva”, sidomos në perspektivën e saj, Zeqirja Rexhepi me të drejtë potencon edhe pengesat që do të has ky projekt historik i zhvillimit të popujve evropianë, në rradhë të parë pengesat nga kundërthëniet e shteteve më të fuqishme, aksionet terroriste, nataliteti i ulët tek popujt evropianë, nga rivaliteti i civilizimeve tjera (amerikan apo aziatik)...

Zyra për informim e USHT-së