Në USHT u promovuan 13 libra shkencorë

Në USHT, më 13.03.2010, ditën e shtunë u bë promovimi i 14-të me radhë i librave shkencorë, të cilat janë përkthyer dhe botuar nga ana e Qeverisë së RM. Me këtë rast u promovuan 13 tituj të librave, të cilat janë mjaft të rëndësishëm për studentët dhe kuadrin arsimor të Fakultetit Filozofik të USHT-së.

Në këtë promovim morën pjesë: Kryeministri i Qeverisë së RM, Nikolla Gruevski, Zëvendëskryeministri, Abdilaqim Ademi, si dhe shumë ministra dhe deputetë.
Rektori i USHT-së, Prof. dr. Agron Reka, në fjalën e tij, pasi u falënderua për ndihmën e deritashme për universitetin, nga ana e Qeverisë së RM dhe Ministrisë së Arsimit dhe Shkencës, kërkoi mjete plotësuese financiare për tejkalimin e problemeve infrastrukturore dhe financiare, me të cilat po përballet ky institucion i arsimit sipëror.

"Nevojitet ndihmë nga Qeveria për realizimin e projektit për studimet e disperzuara dhe për përfundimin e ndërtimit të objektit të Fakultetit Juridik dhe atij Ekonomik, në kompleksin e Rektoratit, në Tetovë”, tha Rektori Reka.

Fjalimi i Rektorit të USHT-së, Prof. dr. Agron Reka

Ministri i Arsimit dhe Shkencës, Nikolla Todorov, theksoi se projekti po zhvillohet sipas dinamikës së paraparë dhe se Qeveria edhe më tej do të vazhdojë të investojë në sferën e arsimit, sidomos të atij sipëror.

Zëvendëskryeministri, Abdilaqim Ademi, në fjalën e tij tha se këto libra do të shërbejnë që studentët të marrin dituri më cilësore dhe se dituria është fuqia e vetme, e cila e çon shoqërinë përpara. “Konsiderojmë se dija si arma më e fuqishme e njeriut është e vetmja forcë, e cila e çon përpara zhvillimin shoqëror. Natyrisht, ajo kërkon edhe mbështetje përkatëse.
Në këtë drejtim, si Qeveri jemi të përcaktuar të bëjmë atë që është e mundshme dhe përveç investimeve të ndryshme të karakterit teknik, të punojmë edhe në krijimin e kushteve sa më të mira në pikëpamje të pajisjes me literaturë të kualitetit të lartë, në mënyrë që studentët t’i ndihmojmë edhe në këtë formë. Këto 13 tituj në gjuhën shqipe, që sot po i promovojmë në Universitetin Shtetëror të Tetovës, së bashku me 10 titujt e promovuar kohë më parë, po në këtë vend, jemi të bindur se do të jenë ndihmesë e mirë dhe do t’u shërbejnë studentëve për nxënien e diturive sa më cilësore”, theksoi Ademi.

Në fjalën e tij, në këtë promovim, kryeministri Nikolla Gruevski theksoi se ky është projekt mjaft i rëndësishëm, sepse studentët marrin dituri nga mendimtarët e shquar të së sotmes dhe theksoi se diploma pa dituri nuk ka vlerë. "Jemi në gjysmë të projektit, deri më tani janë publikuar 247 tituj, nga 500 të paraparë, dhe deri në fund të vitit duhet ta përfundojmë këtë projekt, ndërsa tashmë po fillojmë me projekt të ri, për botimin edhe të 500 titujve të ri", paralajmëroi Gruevski.

Në kuadër të projektit për përkthimin e librave shkencorë është paraparë, në dy fazat e projektit të përkthehen gjithsej 1000 libra, prej të cilave 250 do të përkthehen në gjuhën shqipe.

Pas përfundimit të promovimit të librave shkencorë, Rektori i USHT-së, prof. dr. Agron Reka, së bashku me Kryeministrin Nikolla Gruevski, të shoqëruar nga bashkëpunëtorët e tyre, si dhe ministrat e kabinetit qeveritar, e vizituan ndërtesën e Fakultetit Juridik dhe Ekonomik, e cila është në ndërtim e sipër.

Kryeministri Gruevski, pasi u njoftua me dinamikën e punimeve, premtoi angazhimin e Qeverisë, në mënyrë që ky objekt të jetë në dispozicion të studentëve, deri në fund të vitit 2010.

Zyra për Informim - USHT
Kontakt: e-mail: press@unite.edu.mk
044/356 500, lokal 542