Vizita në  USHT, kremi i takimeve të kryediplomatit turk, Davutogllu 

Në kuadër të vizitës dyditore në Republikën e Maqedonisë, Ministri i punëve të jashtme i Republikës së Turqisë,  Ahmet Davutogllu, të enjten pasdite qëndroi në Universitetin Shtetëror të Tetovës.
Në mungesë të Rektorit, prof. dr. Agron Reka, i cili ndodhet për vizitë pune në Finlandë, krye diplomati turk në USHT u prit nga Prorektori për arsim, prof. dr. Ismail Ahmedi dhe Prorektori për shkencë, doc. dr. Reshat Qahili.

Ministri turk, në takimin miqësor që realizoi me drejtuesit e USHT-së, deklaroi se përkundër asaj se është mjaft i lodhur nga takimet dhe vizitat e shumta, vizita në Universitetin Shtetëror të Tetovës është mjaft domethënëse për te.

“Kjo vizitë në Universitetin e shqiptarëve në Maqedoni është kremi i të gjitha takimeve që kam realizuar në Republikën e Maqedonisë. Në mesin tuaj ndjehem mjaft i nderuar dhe ju premtoi angazhimin tim në të ardhmen dhe me plot kënaqësi do të mbaja edhe ligjëratë para studentëve të USHT”, theksoi ministri Davutogllu.

Po ashtu, diplomati i lartë nga Turqia shtoi se qeveria turke, por edhe ai personalisht e ndjen veten mjaft të afërt me shqiptarët dhe premtoi se do të angazhohet maksimalisht për t’i ndihmuar shqiptarët, në të gjitha fushat. “Kemi një ndjesi të lidhjeve mjaft të afërta me shqiptarët. E ndjej veten mjaft të afërt me shqiptarët dhe jam i gatshëm të ndikoj për të ndihmuar në të gjitha aspektet”, deklaroi ministri turk i punëve të jashtme, në takimin me drejtuesit e USHT-së.

Prorektori për arsim i USHT-së, prof. dr. Ismail Ahmedi, pasi shprehu falënderimin e tij për vizitën e ministrit turk dhe e njoftoi me bashkëpunimin e deritashëm që ka USHT me universitetet e ndryshme të Turqisë.

“Sado që vizita është e shkurtër në kohë, megjithatë kjo është një mbështetje e hapur dhe e fuqishme për USHT”, tha Prorektori Ahmedi, duke shtuar se vet autoriteti akademik, shkencor dhe intelektual i ministrit Davutogllu, si dhe ndikimi i tij, jo vetëm në shtetin turk, por edhe në rajon dhe më gjerë, ka impulset e veta edhe në vendin tonë.

Në përmbyllje të vizitës, Prorektori Ismail Ahmedi, ministrit Davutogllu i dhuroi pllaketën e Universitetit, me vitin e themelimit 1994, një pikturë  me pamje të Xhamisë së Pashës në Tetovë, të punuar nga studentët e Fakultetit të Arteve dhe një libër autorial të tij, për dokumentet arabe në Kosovë.

Në fund të takimi, bashkëbiseduesit vlerësuan se kjo vizitë në USHT do të kontribuojë edhe më shumë në forcimin e marrëdhënieve mes USHT-së dhe universiteteve nga Republika e Turqisë.