Fakulteti i arteve – Dega e Muzikës me aktivitete të shumta shënoi festat e fundvitit

Dega e Muzikës që funksionon në kuadër të Fakultetit të arteve të USHT-së, festat e Vitit të Ri, i shënoi me disa aktivitete. Fillimisht në lokalet e këtij fakulteti që gjenden tek Qendra Kulturore e Tetovës, u organizua Tribunë Muzikologjie kushtuar 100 vjetorit të lindjes së kompozitorit të njohur shqiptarë Lorenc Antonit.

Kjo tribunë, njëherit është edhe e para e këtij lloji që mbahet në këto hapësira. Në prani të një numri të konsiderueshëm të studentëve të Fakultetit të Arteve si dhe dashamirëve të muzikës, për rëndësinë e kësaj tribune, foli, Shefi i Programit Studimor të Muzikës, Mr. Fatos Lumani.
“Ne nuk kemi Akademi Shkence, apo institucione tjera të cilat duhet të përkujdesen për shënimin dhe kultivimin e këtyre figurave të mëdha të kulturës shqiptare, prandaj ne duhet me angazhimin tonë duhet të organizojmë Akademi të këtilla dhe manifestime tjera për të kujtuar dhe nderuar, këto figura të cilat tërë jetën e tyre, ia kushtuan kulturës shqiptare”, theksoi shefi i Programit Studimor të Muzikës, prodekani, Mr. Fatos Lumani.

Për jetën dhe veprën e kompozitorit Lorenc Antoni, foli studentja e Etnomuzikologjisë, Liveta Arsllani. Ajo me këtë rast tha se Lorenc Antoni ishte një personalitet i shënuar në kulturën dhe artin në Kosove, pasi me gjithanshmërinë e tij duke punuar si studiues, etnomuzikolog, muzikolog dhe kompozitor i shquar i siguroi vetes vendin e merituar në historinë e muzikës shqiptare.

Lorenc Antoni lindi më 23 shtator të vitit 1909 ne Shkup, ku i mori njohuritë e para për muzikë, duke mësuar privatisht nga muzikant të njohur të asaj kohe.
Kompozitori Lorenc Antoni me mbledhjen e këngëve kishte filluar shumë herët mirëpo punën e tij intensive do të merret në vitet e 50-ta, të shekullit të kaluar. Gjatë asaj kohe, ai do të shfrytëzonte edhe mundësitë më të vogla për të shënuar këngë, ndërsa me inkuadrimin e tij në Radio Prishtinë do të ketë një organizim më të mirë të këngëve dhe punë më profesionale, duke përdorur mjete teknike më të avansuara për incizim.

“Lorenc Antoni, është një studiues i madh i cili e meriton epitetin e të parit për atë çka ka bërë dhe ka aritur në hulumtimin dhe studimin e folklorit shqiptar. Ai ishte mbledhës, përpilues i blejeve, analitik, studiues, pra ishte etnomuzikolog në plot kuptimin e fjalës, i cili bëri që muzika popullore shqiptare të dihet dhe njihet”, theksoi studentja e Etnomuzikologjisë, Liveta Arsllani.
Në kuadër të shënimit të festës së Vitit të Ri, Dega e Muzikës, të hënën më 28.12.2009 organizoi edhe koncert të studentëve të degës së muzikës, të cilët performuan pikat e tyre muzikore në amfiteatrin e Rektoratit të USHT-së, para një auditoriumi të konsiderueshëm të konsiderushëm të studentëve dhe stafit akademik të USHT-së.

Sipas drejtuesve të programit Studimor të Muzikës, ky koncert u organizua, pasi skena asesi nuk mund të mendohet pa artistin, por edhe artisti pa skenën. Dhe nëse pretendohet që të nxiren artistë të mirëfilltë nga ai fakultet, është mëse e logjikshme që ata kohë pas kohe të arriturat e tyre t’i prezantojnë para publikut dhe të marrin vlerësimin e tyre.

Manifestimi qendror i organizimeve të Degës së Muzikës me rastin e Vitit të Ri, ishte Koncerti i organizuam më 29.12.2009, në amfiteatrin e Rektoratit të USHT-së. Në këtë koncerte me pikat e tyre vokalo-instrumentale u prezantuan studentët dhe profesorët e Degës së Muzikës. Koncertin e hapën studentët e klasës së Prof. Blerim Grubit, me disa pika të përzgjedhura me muzikë kamertale.

Profesorët e Muzikës, Besiana Mehmeti dhe Shkëlzen Baftiari, u prezantuan me pika të veçanta, ku përshtypje të veçantë me virtuozitetin e tij në piano, tek të pranishmit la Shkëlzen Baftiari me  “Fluturimin e Brumbullit” .
Risia e këtij Koncerti ishte prezantimi me disa këngë i Korit Kamertal “Akademia”, i drejtuar nga Profesori i Degës së Muzikës, Selami Kolonja. Ata në këtë koncert u prezantuan me disa këngë korale të shkruara nga vetë dirigjenti dhe njëherit udhëheqës i këtij Kori, Selami Kolonja. Do të veçonim këngët “Lule Universitet”, këngë kushtuar këtij tempulli të diturisë, këngën “Perëndeshë e bukurisë” si dhe kënga “Marxhelo” e cila lirisht mund të quhet kurora e këtij evenimenti, të cilat lanë përshtypje mjaft të mirë tek publiku i pranishëm në Amfitetarër.

Duhet thënë se Tribuna Muzikologjike dhe Koncerti i Studentëve janë organizimet e para të llojit të tyre që  organizohen për herë të parë nga ana e Programit Studimor të Muzikës të USHT-së, edhe atë me iniciativë të Prodekanit të Fakultetit të arteve dhe njëherit shef i Programit Studimor të Muzikës, Mr. Fatos Lumani.

Zyra për Informim - USHT.
Kontakt: e-mail: press@unite.edu.mk
044-356-500, lokal 542